C.V. De Zweitlanceers - Groéselt

2026 Prinses Demi I - D. (Demi) Halders

Proclamatie

Proclamatie 2026

Groéselt, 10 jannewarie 2026

Ich, preenses Demi de ieste,
Carnavaleske regissëur uüver ‘t Riék van de Groéselder Zweitlanceers
Van ‘t roondpeunt tot verbié twie aad-mejoors,
Van ’t sjpoer aon de Sjtäosie tot zoe wiéd es te loors.
Van d’n Oesjerwëg tot aon ’t Vuüle,
En van de Ziëpwëg tot aon de muüle.

Proclameer plechtig en opréch:
Es fanatiek loüper ién de naach van Guelpe of nao Banneux.
Es verpleegkundige op ’t MUMCeu,
Es klarinêttiste bié ôs aw hermenie,
Es groete fan van sjiévele ién de sjnie.

Es feesnömmer bié Roop d’n Ober op de sax,
Es echte lëvensgeneter: ’t ês mer wat ste zelf devan maks.
Es mejd van ‘nnen Êkkelder Brakkelèr,
Es gruutsje klejndochter van Wis en Bèr .

Bié de trompöt van m’nne pa,
Bié de acteertalente van myng ma.
Bié ’t bês bewaorde gehym van ‘t duerp,
Bié alle Jägermeister wat ich nao bênne sjluerp.

Bié de klaanke van ôs zäote hermenieke,
Bié ’t doerbrëke van alle karnevals sjtatistieke.
Bié alle berichte op Instagram, Facebook en Whatsapp,
Zek ich uch noé wie ich de koëmende Vastelaovend vuur oüge heb:

Ten ieste
’t Ês toch per öm säome ién Groéselt vastelaovend te helle?!
Es d’r ién Mesjtreech sjtaot vuur uch te laote hoële: mich neet belle!

Ten twiede
Dao ês vanaal ién dizze wèreld aon de haand,
Meh mêt karneval zit v’r allen aambras efkes aon de kaant.

Ten derde
Joonk en aad wêl ich bié ôzze vastelaovend betrêkke,
Vuur zalle de sjletings-tyje van de kaffees tot ’t uúterste rêkke.

Ten veerde
Karneval ês vashawe, loslaote en af en toûw oüch get biere
Eleng säome haaw vuur dis prachtige tradiésie ién iere.

Ten vyfde
D’r vraog uch mesjien aof: oé kömp dat aander mèdeke vandan?
Ich sjtel uch gên vuur aon myng persoenlikke adjudaante: Ann.

Ten zêsde
Boéte ês ’t al e päor daog ‘nt vrere en ‘nt snjiéje,
Op myng preensessebal goën v’r dus awwerwêts après-ski-je.

Ten ziëvende
Op karnevalszoondig wêl ich mêt uch doer ’t duerp paradere,
Es v’r mêt hil vëul luî op geng zién, zoûw ich dat bezeunder waardere.

Ten aachste
Nëm soondes de zon, gooj zên en eur instremeente mêt,
Mesjien pak ich zelf waol myng saxofoon of klarinêt.

Ten nuügende
Ién d’n optoch hoëp ich vëul wäoges, groepe en Einzelgängers te zién,
Haaw ôzzen optoch ién sjtaand, zit uch dao estebleef vuur ién.

Ten tiende
En es d’r uch op diënsdig têks beet aon ’t vervèle,
Zit uch e maske op en gaot oonbekênd, wat kênt uch dat sjèle?

Ten elfde
Ich, preenses Demi de ieste, gaon éch van dizze karneval genete,
En mêt dis wëurd, wêl ich gruutsj myng proclamäosie besjlete:

GROÉSELT: ALAAF!
GROÉSELDER ZWEITLANCEERS: ALAAF!
DE GROÉSELDER VASTELAOVEND: ALAAF!

Preenses Demi de ieste