2012 Prins Marc I - M. (Marc) Spronck

Proclamatie

Groéselt, 14 jannewarie 2012

Ich, preens Marc d'n iéste van de Zjwéitlanceers

Heerser uüver 't riék vaan de Zjwéitlanceers
Van de Bênnediksjtraot, de sjtraot van Fien en Bèr
tot oonder ién 't tuerp aon de Kwizzenjère
Vaan de Sjtaösie tot aon de Beuk
En alle aander sjtraote en heuk

Ich zal doer 't lëve goën ês
Marcus, Benediktus, Sebastianus, Historicus, Cetabevaricus

Ién de orde van de Zjweitlanceers
Mêt de huelp van m'n raod van Elf
Gezjwoëre bié de baord van Sinterklaos
Veurziën van verseersele die daobie heure

Bié de gratie van
't allervyste maske
de vêndele van ôs twie zaote hermenieje
en de awwen bokkepoet oét m'n sjêlderskis

Zegk ich ês
Aad lid van de raod van elf
Groétbewoener van de Benediksjtraot
Groétgraof van 't Brook en ‘t Julianaplein
Aofsjtammeling oét 't gesjag van de Sjproonke
Getroûwd met Elian oét ‘t sjmiëdgesjlach
Vajjer van Bjorn, Gus en Fons
Gewërsjlëper bié de blôw kompanjie
Hofleveranceer van alle verf aon carnavalsveerders

Vastelaovendsveerder ién hert en neere
En veerenviéftigste preens van de Zjweitlanceers

Brynk ten gehuure en ten oétvuur

ten iéste
De cent zien op, de sjatkis ês bekaans lèg
Toch zal de crisis ôzze vastelaovent neet bederve
Mêt de verf oét m'n sjêlderskis
Zal ich de vastelaovend roed gël en greun goën verve

ten twiéde
Veert carnaval ién eur eige duerp
Dat ês wat Frans Theunisz zèt
En ich ês preens Marc d'n ieste
Deenk dat dèh maan groet geliek hèt

ten derde
Ich ken dit neet elleing
Meh de roeje, de gële en de greune
Zalle mich dat wët ich ziëker
Allemaol ién dis carnavalsdaog sjteune

ten veerde
En vuur de kleinste van ôs duerp
Heb ich nog 'n groete weens
Maok veul sjpats en plezeer
Mêt de noûwe blokzjweiterspreens

Ten vyfde
De inmiddels roemruchte hiérezitting
Vêlt op vyf fibberwarie dit jaor
De artieste sjtoën al te traampele
De obers sjtoën mêt de sjeenkblaojer klaor

ten zesde
Repeteer de koemende wëke met sjprynge
En lier de nôw vastelaoventsleedsjes zynge
Of gëf uch op bié ‘n hermenie
Dan beet d'r mêt die dry daog ziëker debie

ten ziévende
Vastelaoveszoondig dat goën v'r aanders doen
Dan haw ich m'n preensebal
Ich hoep dat d'r allemaol mêt wêlt doen
Dat wurd 't sjoenste bal van aal

Ten aachste
Vuur d'n optoch hoep v'r op sjoen wèr
Al brynk mich dat neet van m'nne apprepo
Ken d'r bie 't bouwe van ‘nne waoge verf gebruuke
Dan kryt d'r van mich ‘nne pot kedo

ten nuügende
Verklejd uch zoe sjoen wie ‘nne pôw
Gedraog uch wie ‘nne naachraof
Zyng wie ‘nne nachtegaol
Dan sjeet d'r dit jaor allemaol de voëgel aof

ten tiende
Dit jaor es ‘t ouch weer groete broonk
En ês nog e bitsje verf ien m'n kiske zit
Kleur ich nao de vastelaovent 't gaans tuerp
Ien de kleure blauw, roed en wit

ten ellefde
Genôg gemould, genôg vertelt
Noe wörd e glëske beer besjtelt
Hié sjtaon ich daan, zoe mer bôts boem baaf
Ugge preens Marc d'n iéste Alaaf

CV de Zweitlanceers op Twitter